Antias Hulandes i Aruba ta haña 8 miyon euro pa restaura monumento. Den presencia di presidente di Nationaal Restauratiefonds, prof. mr. Pieter van Vollenhoven, e minister Arubano di Labor, Cultura i Deporte, Ramon Lee, gezaghebber Lizanne Dindial di Corsow, Diputado Marugia Janga di Boneiro i e minister hulandes di Enseñansa, Cultura i Ciencia, Ronald Plasterk, a firma e protocolnan cu ta regla un ke otro. Sint-Maarten i Sint-Eustatius ya den un fase anterior a firma un protocol.

E edificionan monumental di antes ta corda tantu habitante dje islanan como turistanan hulandes i e otro parti di mundo con a logra realisa e cultura riku i e edificionan aki, i ta juda hende compronde di unda nan a bini, ken nan ta i cu esei tambe con nos kier sigi huntu.

E islanan lo dicidi cua monumentonan mester proteha. E 8 miyon euro ta destina pa yuda doñonan particular di monumento i fundacionnan cu financiamento di e restauracionnan generalmente costoso di e monumentonan. Nan por haña un fiansa na interes abou, cu cua nan por alivia e peso financiero di un restauracion. Ta destina amortisacion di e fiansanan pa por duna otro doñonan tambe fiansa i asina crea un fluho di placa continuo pa cuido di monumento na Antias i Aruba.

E islanan por pidi sosten na Rijksdienst voor het Cultureel Erfgoed i na Nationaal Restauratiefonds. Aunke no por restaura tur monumento cu e placa cu ricibi, e ta en todo caso un paso importante pa duna cuido di monumento na Antias i Aruba un empuje fuerte.