|
Investigacion
andando den caso Macuarima
Ayeranochi,
4 di april 2008, despues di melding di candela den un cas, Polis
a haya pa mas o menos 21.30'or e curpanan sin bida di tres miembro
di un famia den un cas na Macuarina. Ta trata di e homber J. Lampe
di 60 aña, su casa A.J. Lampe-Geerman di 57 aña
y nan yiu homber E.P.J. Lampe di 30 aña di edad. E circunstancianan
bao di cual e curpanan a wordo haya, ta trece e sospecho cu ne
cu nan a perde nan bida dor di un delito. Recherche tactico y
tecnico a yega na e sitio inmediatamente, como tambe fiscal.
Mientras
cu Polis y Justicia tabata na e sitio, un homber a meldo su mes
na Warda di Polis Santa Cruz cu un storia straño tocante
intento di incendio y e tres curpanan den e cas. Relaciona cu
e declaracaion aki, como tambe e circunstancianan bao di cual
a haya e tres curpanan den e cas, e persona aki, e homber E.J.L.
di 29 aña di edad, a wordo deteni riba sospechoso di (intento
di) incendio c.q. asesinato c.q homicidio.
Aunke
e sospecho ta existi cu e victimanan a perde nan bida dor di un
delito, e causa exacto di nan morto no ta cla ainda. Speranza
ta cu e patologo lo por duna mas claridad riba esaki awetardi
ainda, despues di investigacion di e curpanan.
Ayeranochi
recherche tecnico (STOHD) a investiga e cas cu cuatro miembro.
Investigacion di e pistanan por ta di gran importancia den e caso
aki y un bon investigacion -na momento cu e total di pistanan
no a wordo stroba ainda- por ta di importancia determinante pa
soluciona e caso. Esey tabata e motibo tambe cu ningun hende,
cu excepcion di recherche, tabata permiti pa drenta e cas. Despues
di 05.00'or a seya e cas. Awe recherche tecnico a sigui cu e investigacion
den e cas.
Polis a forma un ekipo di nuebe rechercheur, procedente di recherche
di Santa Cruz, San Nicolas y Playa. Si ta necesario, e ekipo aki
lo wordo amplia mas.
Ta
pidi tur persona cu por tin informacion tocante e caso dramatico
aki pa tuma contacto cu recherche Santa Cruz.
|