.
ORANJESTAD 25 juli 2009 — Informa bo mes bon, promer cu
tuma vacuna.
Ayera mainta durante un conferencia di prensa na Directie Volksgezondheid, a duna un update tocante e Swine Flu. Durante e conferencia diferente pregunta interesante a wordo haci. Entre otro a wordo puntra tocante e vacuna cu ta contene e substancia Mercury (kwik). Aki Dr. Gregory Fung-A-Fat di Directie Volksgezondheid ta admiti cu e vacuna cu nan ta usando pa duna e adultonan na Aruba actualmente, no ta apto pa mucha, pasobra enberdad tin e substancia Mercury aden. Dr. Gregory Fung-A-Fat ta remarca si, cu e vacuna cu nan ta en espera di dje, lo ta specifiekamente pa mucha. Den e vacuna aki pa mucha no tin ningun mercury of otro substancia cu ta supuestamente "schadelijk" (dañino) pa mucha.
Un otro pregunta interesante tabata cu tin varios dokter cu ta bisa den prensa cu no ta necesario pa tuma vacuna. Segun e dokter, si bo ta un persona bon di salud y bo ta tuma e vacuna, bo tin chens di haya e "na effect" y bira malo despues. Segun Dr. Gregory Fung-A-Fat, dokternan cu ta bisa esey, no tin e informacion corecto y nan no ta jama pa haya sa e ultimo datos, cu nan si ta haya directamente for di compania. Dr. Fung-A-Fat ta sigi bisa, si dokter no jama, e no ta haya informacion y si e asumi, abo como pacient ta haya informacion incorecto.
Aunque ningun vacuna por duna 100 porciento garantia di cubri tur e strains di e influenza, Directie Gezondheid ta keda enfatisa pa busca bo vacuna pa asina juda hisa bo resistencia.
Nos di Solo di Pueblo ta kere cu cada persona mester informa su mes hopi bon y di tur banda, promer cu tuma un decishon pa injecta cualkier vacuna den bo curpa sin cu ta prueba cu e ta safe. Manera Hoofd di Dienst Besmettelijke Ziekten sra. Sharline Koolman-Wever a laga sa: Salubridad Publico ta informa, pero cada persona ta dicidi pa su mes.
E pregunta ta, ki nos ta haci cu tur e otro informacion tocante e vacuna contra e A/H1N1 cu ta contradici e informacion di Salubridad Publico? Time will tell.
Fuentenan: