.
ORANJESTAD 25 juli 2009 — Aruba conoce 34 caso confirma
di hende cu tin e virus A(H1N1)
Segun director di Salubridad Publico, dr. Trevor van Gellecum, e cantidad di hende cu a meld nan mes na e Diagnostic Center a surpasa 560 caso. For di nan un total di 329 muestra a wordo tuma y manda pa test, cu a resulta positief pa un total di 34 caso confirma.
A wordo constata cu e cantidad di hende cu ta acudi na Diagnostic Center y cu ta nesecario pa tuma muestra, a baha drasticamente, y pesey a dicidi di muda e lugar for di dilanti di Aeropuerto (Wayaca) pa e edificio net patras di Salubridad Publico den Avicennastraat. E Diagnostic Center su horario nobo lo ta habri for di Dialuna te cu Diasabra, for di 1'or di atardi te cu 4'or di atardi.
Te asina lew un total di 23 mil vacuna a wordo duna caba y combina cu e 22 mil vacuna cu a wordo duna den e ultimo lunanan, e total ta bira 45 mil vacuna. Aunque cu nan a stop di duna vacuna door cu no tabata tin mucho hende a bin busca nan vacuna, nan ta bai ta habri atrobe Dialuna y Diamars, esta 27 y 28 di juli, pero solamente parti mainta for di 8'or te cu 12'or. Esaki ta bai ta solamente na Playa aworaki. Esnan cu ainda ta interesa pa tuma vacuna por pasa riba sea 27 of 28 di juli segun e horario menciona.
Dr. Trevor van Gellecum ta haci un suplica pa voluntario, enfermeronan pa bin juda di duna e vacuna. Esnan cu ta dispuesto pa duna un man, por jama 5224 200. Si bo por juda pa 1 ora of mas den dia, tur ta bon bini.
Pa loqual ta trata e vacuna pa mucha, ainda nan ta wardando riba e ultimo informacion. Aunque e bestelling tey y ta na caminda, ta spera tambe pa wak cuanto voluntario ta reaciona. Asina cu e vacuna pa mucha yega y cu nan sa cuanto voluntario tey pa juda, por planea tur esaki mas mihor. Un bes mas Trevor van Gellecum ta enfatisa cu aki no ta trata di e vacuna contra e A H1N1.
Fuentenan: