ORANJESTAD, Aruba - 29 Mei 2009: Preparacionan ta den full swing pa e apertura oficial di Museo Arqueologico Nacional Aruba cu ta tuma lugar di 26 di Juli 2009. Danki na e confiansa y financiamento di Fondo Europeo pa Desaroyo, Gobierno di Aruba y UNOCA, Aruba por conta cu un museo arqueologico hopi bunita mes, cu ta di gran balor historico pa Aruba, pa su hendenan y pa su Cultura.

Parti grandi di e apertura oficial lo ta ensera un show espectacular den aire liber cu lo tuma lugar ariba e plein dilanti di museo. E show aki lo ta den cuadro di weganan di Reino Cultural y ta un ‘regalo’ di Hulanda. Meta di Weganan di Reino Cultural ta pa fortifica lasonan den reino por medio di cultura. Actualmente ta na Aruba señor Arthur de Bussy cu di parti di Hulanda ta encarga cu henter e show den aire liber. E show lo ta bou guia di e regisor for di Hulanda, Aike Dirkzwager, conhuntamente cu e regisor di Aruba, Takhai Mohamed. Aike Dirkzwager ta un regisor masha conoci na Hulanda, specialmente pa cu show den aire liber y conhuntamente cu Takhai Mohamed y henter e elenco lo sa di brinda henter Aruba un show inolvidabel. E elenco ta consisti di diferente actor y artistanan for di diferente parti di Reino Hulandes. Diferente di nan ta na Aruba actualmente pa prepara pa e show. Nos por menciona entre otro e siguiente nombernan: Jackie Bernabela (Bonaire), Roy Colastica (Corsow), Priscilla Maria (Corsow), Roly Kelkboom (Corsow), Urmain Dormoy (St. Maarten), y for di Aruba Alydia Wever.. Tambe ta cu placer y orguyo pa por menciona cu e Maestro Dirigente di koor di Aruba, señor Rufo Odor tambe lo forma part di e show . No por keda sin menciona cu lo tin musica y efectonan special door di e grupo Datapanik cu tambe lo ta parti di e show grandi aki.

Un y tur ta bon bini pa bin wak e tremendo show aki y gosa di e diferente actividadnan cu lo tuma lugar durante e apertura oficial. Lo bai tin suficiente lugar pa hende por sinta y entrada pa cu henter e apertura cu lo tuma ariba e plein ta completamente gratis. Na caminda pa e apertura oficial mas informacion lo wordo publica relaciona cu henter e apertura oficial y tambe relaciona cu cada un di actividadnan aki.

E siman cu ta sigui despues di e apertura oficial, dianan 27 di juli te cu 31 di juli, lo ta jena cu diferente actividadnan sumamente interesante, informativo, educativo y den hopi bon ambiente. Lo bai tin un debate di reino, workshops, presentacionnan di buki, diferente lectura, programanan special pa mucha y hopi mas. Na caminda pa e apertura oficial mas informacion lo wordo publica relaciona cu cada un di actividadnan aki.
.