Inscribi awor gratis pa Extreme H Games dia 30 di Mei 2009, na YMCA San Nicolaas. Esaki lo ta e di tres edicion pa 2009 y lo tin atrobe invitadonan nobo cu lo hasi e sesion hopi interesante pa nos muchanan. E biaha aki lo tin como invitado special personanan di Scout cu lo hasi demostracionnan cu ta importante pa nos hobennan ta na altura dije.

RBTT y ENNIA ta e sponsornan principal pa e projecto aki y nan ta den compania di Inter-service Clubs of Aruba, cu ta consisti di tur e clubnan di servicio na Aruba. Subway cu semper ta percura pa nos muchanan come saludabel ta un biaha mas cu EXTREME H GAMES dia 30 di Mei 2009.

Durante di e ultimo evento na Centro Deportivo Frans Figaroa na Noord, tabata tin demostracion di Judo, tabata tin cuminda saludabel cu e muchanan mes a prepara. Tur hoben por inscribi gratis pa EXTREME H GAMES, na unda cu nan ta sera conosi cu cu un forma di bida nobo. Durante di e actividad aki e hobennan ta realisa nan mes cu biba salud kier meen come bon, saludabel, pero tambe hasi ehersicio, sport y actividadnan varia cu ta leuk tambe, manera baile, musica y arte.

Comunidad cu Vitalidad ta kere den un comunidad sano. Nos mester cuminsa na nos hobennan y asina pone e fundeshi fuerte pa un comunidad sano den futuro. EXTREME H GAMES ta un di e poco actividadnan cu ta dedica completamente na nos hobennan. Dia 30 di Mei lo tin e tan gusta Capoeira pa Marlon Mathew y street dance di Danza Aruba. Caisa Schotborg ta bin cu ehersicionan di meditacion y relahamento nobo pa nos muchanan. Lo tey presente atrobe nos pintor Elvis Tromp. Ehersicio ta clave den un bida di un ser humano, y Rene Wild ta percura pa nos hobennan ricibi esaki y ariba un nivel special pa nan. Mas importante ta e hecho cu hobennan por pone nan man den cuminda, berdura y traha nan mesun cuminda. Nan ta come fruta y ta ricibi informacionnan clave den alimentacion. Nos chefnan Reynaldo Maldonado y Alex Adoptie ta percura pa e variedad ta uno sabroso y saludabel. Nan ta ricibi unsaludabel sandwich di Subway cu semper a coopera cu Extreme H Games y ta mira e importancia pa nos hobennan come saludabel. Tambe Visser Trading y C&BM N.V. ta coopera semper cu Extreme H Games.

Tur hoben cu a participa te awor na eXtreme H Games ta papia di dije y si ainda bo no a bai un di e eventonan di e projecto aki di Comunidad cu Vitalidad, sigur bo ta perde e oportunidad pa sera conosi cu un estilo di bida mas sano. E evento ta inicia for di 10’or di mainta y ta termina pa 1:30 di merdia. Pa motibo cu un cantidad limita di hobennan so por participa, mester yama inscribi pa por tuma parti na eXtreme H Games. Hobennan entre 6 pa 17 anja por participa. Inscripcion ta posible door di manda nomber, edad y cantidad di mucha na C&BM N.V. na fax: 5838677. Tambe por yama C&BM N.V. na telefon 5828121 of 5922230 pa inscribi. Inscripcion ta gratis. Comunidad cu Vitalidad ta parti di e mision y vision di e instituto Richard Visser. E instituto aki a bin ta haciendo y lo sigui hasi actividadnan cu ta saludabel, cu ta brinda educacion y ta presenta e oportunidad pa mira alternativanan pa un persona biba un bida saludabel den tur sentido.

Comunidad cu Vitalidad