ORANJESTAD, Aruba - 14 di Juni, 2009:
Universidad di Aruba a organisa un evento special den Hyatt Regency Resort pa entrega di diploma na 13 graduado nobo den e ramo di "Hospitality & Tourism Management". E grupo aki a caba 2 aña di estudio na Colegio EPI, sigui pa 2 aña na Universidad di Aruba. Tambe tin un grupo cu a gradua despues di a caba Colegio Arubano y cu a specialisa den ramo di "International Tourism Management". Awor nan ta cla prepara pa drenta e mercado laboral, cla pa forma un carera den e industra turistico di nos pais.

Durante transcurso di e anochi varios invitadonan distingui a felicita e graduadonan y a encurasha nan pa sigui padilanti den nan carera profesional cu apenas ta cuminsando. E oradornan durante e anochi aki tabata entre otro Mr. Patrick Brown, den su calidad di Presidente di Hunta di Directiva na Universidad di Aruba, Dr. Ryan R. Peterson, decano di e facultad di "Hospitality & Tourism Management Studies" na Universidad di Aruba, John Wardlaw, como instructor den e materia aki y Thais Nierop kende tambe ta un instructor na Universidad di Aruba.

Durante e ceremonia official por a tuma nota di caranan contento y orguyoso, no solamente di e studiantenan pero tambe di nan famia y conocirnan. E grupo cu ta carga e nomber di "Class 2009" a haña nan diploma como un simbolo di nan gran esfuerzo. E 13 graduadonan ta Illiana Croes, Stephanie Croes, Diana Croeze, Alexander Cruz, Diana Herrera, Minerva Kock, Emilie Kock, Ayerim Lacle, Melendy Neuman, Juan Carlos Solis Escobar, Carlos Terranova, Marc Tiemes y Margarita Milagros Yarasca Olaechea.

E studiante Diana Alejandra Herrera Monroy, un di e graduadonan di e "class 2009" a ricibi e reconocimento como "Valedictorian" kende a sobresali cu un promedio di 3.84 den su klas. Diana Alejandra a yega Aruba algun aña pasa for di Colombia unda cu e la haña su mes confronta cu un cultura, idioma y sistema educacional completamente diferente di lo cual e tabata custuma cune. Pero cu hopi perseverancia e la logra sobrepasa tur e obstaculonan aki pa asina usa su sabiduria y asina comberti su mes den un profesional. E mensahe cu e la comparti cu su coleganan di scol ta consisti di tres ehersicio. E tres ehercisionan aki ta encera "corda", "pensa" y "reflecciona". E ehercisionan aki tin un balor individual, pasonra e satisfaccion, experiencia, apoyo di famia y amigonan y e refleccion pa loke futuro ta bin cune no a caba aki, alcontrario, awor e ta cuminsa.

E gerente general di Digicel Aruba, Michelle Winklaar, tabata un di e oradornan invita durante e anochi aki. Den su discurso na e recien graduadonan, Michelle Winklaar a yama e profesionalnan den turismo pabien cu nan logro y a bay bek den tempo pa corda tempo cu ela gradua 18 aña pasa. Ela bbisa e recien graduadonan cu elo kier duna nan e mesun conseho cu elo kier duna su mes, teniendo na cuenta awor cu e tin 18 aña di experiencia den trabou. Segun Michelle Winklaar e mihor conseho ta pa nunca perde e animo pa mas conocimiento. "Siñamento no ta caba ora bo gradua, nos tur ta keda siña a base continuo y dor di puntra y cuestiona, nos ta sigui siña cosnan cu nos no tabata sa". E ehecutivo di Digicel a haci un apelacion riba e hobennan pa duna lo maximo den nan futuro trabou, pasobra Aruba mester di nos mesun profesionalnan, bon prepara y cla pa hiba nos industria turistico na e siguiente nivel.

Un palabra di pabien ta bay na tur e graduadonan den e ramo di "Hospitality & Tourism Management Studies" di Universidad di Aruba…..Aruba ta orguyoso di boso!