Terug
.
Di acuerdo cu investigacion restrospectivo:
Aruba mester expande cuido neonatologico

.

Oranjestad, 16 di juni 2009

Na Aruba tin un indice di mortalidad perinatal demasiado halto. Esaki ta un di e conclusionnan principal cu sali di un investigacion encuanto morbididad y mortalidad neonatal na Aruba, ehecuta dor di e studiantenan Esther Klopper y Caroline Nierkens, bow di supervision di neonatologo Djien Liem (Radboud Ziekenhuis Nijmegen) y pediatra Wicha Ponson-Wever. E investigacion aki, cual a tuma lugar na 2008 y ta trata di e periodo di 2005 pa 2007, tawatin como meta haya un bista di e cuido perinatal na Aruba y tambe tocante e problema di transportacion di babynan recien naci, inventarisa e posibilidadnan pa mehoracion di e cuido perinatal na Aruba, y yega na recomendacionnan pa realisa mehoracion. Como resultado di e investigacion aki a publica recientemente e "Rapport Perinatale Zorg op Aruba".

Un otro conclusion di e investigacion aki tabata cu tin un cantidad demasiado halto di parto via cesarea y un cantidad demasiado halto di embaraso hubenil na Aruba. E indice di mortalidad perinatal ta mas halto cu na Hulanda y Merca, y por wordo compara cu Sur-America y Europa Oriental. Factornan cu posibelmente ta hunga un rol ta parto via cesarea, embarazonan hubenil, e calidad di cuido perinatal na Aruba y e calidad di cuido perinatal na Colombia. Transportacion perinatal ta contribui na un parti grandi di e mortalidad neonatal.

Como cu Aruba ta chikito, hospital di Aruba no ta dispone di un unidad di cuido intensivo neonatal. Pa motibo di su posicion geografico babynan recien naci cu ta sufri di malesanan grave mester bai cu transporte aereo prome cu nacemento (transporte intra-uterino) of despues di nacemento (transporte neonatal) pa tratamento den exterior, principalmente pa Colombia.

E metodo cu a aplica den e investigacion aki ta uno retrospectivo, cual ta concerni e añanan 2005-2007. A colecta datonan di 162 baby recien naci:
- 66 recien naci (58 embarazo) naci den exterior despues di tranporte intra-uterino (11 a fayece)
- 31 recien naci manda pa exterior pa medio di transporte neonatal (10 a fayece)
- 49 baby cu a nace morto despues di un termino di embaraso di 22 siman of mas
- 16 recien naci cu dentro di 28 dia di bida a fayece na Aruba.

E resultadonan di e investigacion a mustra un indice promedio di nacemento na Aruba di 13.2 pa cada mil habitante. E incidencia promedio di parto cerca teenagernan tabata forma 12% di e total. Di e muhernan 64% a duna lus normal y 34% pa medio di cesarea; vacuüm of forceps (2%) tabata sumamente excepcional.

Transporte intra-uterino tawata tuma lugar principalmente pa Colombia (90%), transporte neonatal pa Colombia (60%) y Corsow (30%). E duracion promedio di embarazo y peso di e baby cu a nace despues di transporte intra-uterino tabata respectivamente 30 siman y 1300 gram; di babynan recien naci cu transporte neonatal esaki tabata respectivamente 34 siman y 2600 gram. E mortalidad despues di transporte intra-uterino tabata 17% y despues di transporte neonatal 32%. Mas cu mita (52%) a fayese den exterior, principalmente a consecuencia di prematuridad (71%) of defectonan fisico congenito (24%).

Mortalidad fetal ta indica e cantidad di baby cu a nace morto despues di un embarazo di por lo menos 22 siman (of 24 siman, of 28 siman), pa cada mil embarazo na un pais (den promil of ‰). Mortalidad neonatal ta indica e cantidad di recien naci cu ta fayese dentro di 28 dia di bida, pa cada mil di baby cu a nace bibo den un pais. Mortalidad perinatal ta indica e suma di e dos indicenan aki. E indice di mortalidad pa Aruba den e investigacion aki tabata como lo siguiente:

Comparacion cu otro pais na mundo ta mustra cu e indicenan di mortalidad na Aruba ta hopi mas halto cu na Hulanda (mortalidad perinatal >22 siman 8‰) y Merca (7‰). Paisnan serca di Aruba tin indicenan comparabel of mas halto cu Aruba (Venzuela 18‰, Colombia 23‰). E otro islanan di reino Hulandes tin indicenan mas o menos comparabel cu Aruba (mortalidad neonatal 0-28 dia na Corsow 7‰).

E investigadornan ta expresa nan preocupacion tocante di e cifranan aki y den e raport ta inventarisa e posibilidadnan pa mehoracion di e cuido perinatal na Aruba. Expansion di e posibilidadnan neonatologico na Aruba y un centro perinatologico mas cerca di cas cu ta cumpli cu e exigencianan di awendia, ta di gran importancia pa nos isla, di acuerdo cu e investigacion.

 

Terug