Feria Aruba 2010 na Juliana School Aruba

12 maart 2010

Den un combersashon cu Nel de Cuba cu ta e maestro encarga cu e projecto di "Feria Aruba 2010" na Juliana School, Skina di Noticia a bai un tiki mas profundo riba e thema aki. Segun Nel de Cuba ta splica cu e projecto aki a inicia un mas o menos 14 aña pasa. Den promer instante e tabata primeramente pa trece e diferente grupo nan di poblacion hunto y asina integra e diferente cultura, idioma y otro aspectonan. Sinembargo ultimo añanan, mas y mas e Feria aki a cuminsa haya conexion cu nos dia Nacional di Himno y Bandera, esta 18 di Maart.

Tur aña e 2e klas MAVO di Juliana School ta wordo parti den grupo di mas o menos 5 pa 6 alumnonan. Cada grupo ta wordo guia door di un maestro, y e grupo por escohe entre un 32 diferente theme cu tin di haber cu Aruba. Aki nos por pensa riba thema manera entre otro e Cushina Arubiano, Nos Pesca, Aloe, Polis, Douane, Setar, Carnaval, Balashi WEB y mucho mas.

E meta ta pa alumnonan no solamente siña mas di diferente aspecto di productonan Arubano, pero tambe pa stimula sinña hunto y coopera hunto. Aunque e school ta percura pa cierto material basico, majoria part e alumno mes mester percura pa jega na dje. E publico e anochi por cana y bishita diferente standnan, unda cada grupo di alumno ta trata di splica mas detaya na e bishitante kiko ta kiko di nan thema escohi. Un grupo di hurado di 5 persona lo cana evalua cada stand pa ultimo saka un ganador. E huradonan ta consisti di hende di enseñanza, sea ex-maestro/a cu ta cu pension of di otro tipo di school. Nos por a ripara un enthousiasmo basta grandi entre e alumnonan y entre esnan cu tabata pasa stand pa stand pa haya informacion.

Señor Nel de Cuba a expresa su deseo di un dia e Feria aki por crece bira un Feria Nacional, unda cada school di MAVO lo saka 3 ganador unda finalmente por saka un solo ganador. E huradonan banda di 9 or di anochi a sinta hunto y finalmente a saka e sigiente ganadornan. Grupo Nos Setar cu 131 punto, Grupo Nos Pesca cu 124 punto y na tercer lugar Grupo Nos Aloe cu 123 punto. Señor Nel de Cuba a laga sa cu e ta satisfecho cu e cantidad di bishita, y cu e FERIA ARUBA 2010 tabata un exito total.
.