Chikito riba mapa pero grandi den curazon

18 januari 2010

Aruba por ta chikito riba e mapa mundial, pero e curason ta grandi y na e lugar corecto. Den e weekend cu a pasa a sali e Fregata Hulandes "Hare Majesteit Pelikaan A 804" direcion pa Haïti pa un mision di mas o menos 2 siman. For di Mariniers Kazerne Savaneta Aruba a sali un peleton di Mariniers y tambe 6 Mariniers Arubano di Arumil. Tur esaki bou guia di e Luitenant Arie Noordam cu por cierto a haci e Officiers Opleiding hunto cu e Luitenant Arubiano sr. Lourenço Teixeira na Hulanda.

Luitenant Lourenço Teixeira mes no a bai e biaha aki y na un banda ta duel e, pero si en caso cu e y su peleton ta wordo escohi pa bai kisas riba e next mission, e ta kere sigur cu nan ta kla pa tur e retonan cu ta spera nan na Haïti. Training cu nan a haya na Sint Maarten style di Anti Riot y tambe recientemente na Aruba con pa anda cu un multitud agressivo (Civil Unrest), sigur lo bai yuda nan enfrenta e situacion na Haïti, unda hende den nan desesperacion pa haya cuminda, awa y ayudo, ta atacando haste e trupanan di Nacionan Uni. E parti ey no lo ta mucho problema pa nos mariniersnan, paso nan ta bon getrain pa esaki. Locual si Luitenant Lourenço Teixeira por mira como un problema ta e bista di tanto duele personal, e cantidad di morto y heridonan. Pasobra mentalmente esey lo traha duro riba cada persona cu mira esaki. En especial ora bo ta realisa cu ni cuanto bo haci bo mihor esfuerso, e cantidad di hende cu bo por yuda ta keda limita. Sinembargo e ta kere cu ey e union di e mariniers lo yuda otro pa nan compronde y accepta e situacion, y sea contento cu cada victima cu nan por a logra yuda.

Aunque den promer instancia nan ta bai riba nan mes, e posibilidad ta existi cu unabez na Haïti nan por bai traha conhuntamente y hasta bow di coordicacion di e autoridadnan Mericano, cu na e momento aki tin mas o menos un 35.000 militair na Haïti.

Promer Ministro di Aruba, sr. Mike Eman conhuntamente cu Minister Richard Visser y Minister Michelle Winklaar tabata na WAF Aruba pa desea e delegacion militair tur forsa y exito riba nan mision pa Haïti.

Riba potret, pa cortesia di Lourenço Teixeira y Kees Bustraan, por wak entre otro momentonan cu miembronan di Arumil tabata haya training Anti Riot na e isla di Sint Maarten y momento cu e grupo ta pose pa saka potret hunto cu Promer Ministro Mike Eman, Richard Visser y Michelle Winklaar.

Nos ta desea Luitenant Arie Noordam, su Peleton y en especial e 6 miembro di Arumil tur forsa, sabiduria y bendishon riba nan mision na Haïti.

.