Oranjestad- 11 Januari 2010 -

A recauda suma di 15 mil florin!

Oranjestad - Dia 11 di januari a tuma lugar na Super Food entrega di donacion na representantenan di tres fundacion caritativo cu ta traha masha duro pa nos comunidad.

Durante luna di December 2009, clientenan di e supermercado Super Food por a escoge pa haci un donacion chikito di Afl.2,50 pa asina haya e oportunidad di gana e suma di nan compras bek. Cada dialuna a saca un ganador kende a keda anuncia den e programa radial “Na drempel di fin di anja” cu Erin Croes. E ganadornan di e campanja di donacion tabata Roland Lejuez, Lidia Boekhoudt, Danilo Wolff, Miangela Figaroa-Tromp y Carmen Tromp. Hunto, e cinco ganadornan aki a ricibi mas cu 3.000 florin bek di nan compras.

E fondonan cu a keda recauda durante e campanja aki a yega casi 15 mil florin y Super Food a contribui e resto pa sera e bunita suma pa regala e instancianan cu ta haci tanto pa nos isla. Cada fundacion a ricibi un cheque na valor di Afl. 5.000. Sra. Vicky Oleana-Vos a ricibi e donacion den nomber di Fundacion Pa Nos Muchanan, Sr. Jeffrey Matos a representa Centro Kibrahacha/Fundacion Pa Nos Grandinan y Sra. Diet Booi a ricibi e donacion pa Asistencia Social Oranjestad.

Super Food kier a gradici tur su clientenan cu a haci donacion pa yuda e instancianan menciona y ta spera di por sigui contribui den futuro cu e comunidad Arubano.