Tamarijn- 9 Januari 2010 -

Nos ta puntrando nos ta kiko ta pasando cu nos aparatonan gubermental ultimo tempo? Pa cuminsa nos a haya salubridad Publico cu ta insisti di vacuna un gran parti di comunidad cu un vacuna cu no ta getest y cu rond mundo tin hende, inclujendo varios dokter y politico, ta lantando contra e vacuna ey. Awor poko dia pasa un Ministro ta core manera ta Meteoro e ta sin cu Polis ta boet e, pa despues su auto ta wordo getakel for di airport pa mal stacionamento. Y awor pa colmo hasta Brandweer a laga e pueblo humilde di Aruba na caya. Ta asina cu for di atardi caba tin un candela basta grandi na un conocido dump di entre otro auto, na e bario Paradera/Tamarijn. Esaki ta trece hopi molester pa henter e bario. Imaginabo cu nos ta haya keho for di Paradera, Bloemond, Babijn, Jaburibari te cu Nuñe. Ta na e ora di 10 di anochi ainda e molester di huma ta manda den e barionan.

Nos a bai tira un bista y nos a spanta di e grandura di e candela na e dump. Ta locual a straña nos, cu nos no a wak ningun instancia official manera Polis, ni Brandweer. Ora di sigi puntra, nos a bin compronde cu for di 4:30 di atardi caba e candela a cuminsa, cu brandweer a bini si, spuit un tiki aki aya y despues a laga e bario cu e batata cayente. Brandweer a laga sa atardi cu despues cu bira scur nan no ta juda mas. Aki nan a trata di jama diferente instancia, pero tur envano. Segun nan ta 2 patryua so tin, dus dobla warda.

Cu ayudo di varios bisiñanan voluntario ta trata di paga e candela. Cu truck grandi ta chupa awa for di dam, y hasta un persona di UNIPA cu ta biba eybanda mes a bin cu su mes un chubato/forklift y a cuminsa kita auto cu no a pega candela d eybanda y pone nan lew for di e candela. E varios tanki di gasoline di auto biew cu ta explota de bes en cuando no ta haci e trabow facil pa e voluntarionan.

Nos no por compronde e actitud y decision tuma pa e commandante di Brandweer di no bini. E por wel ta un tereno priva, pero e molester no a keda na e tereno priva so, pero a plama pa full e barionan den becendario. Tur hende eybanda enbes di drumi ta soda trata di haci un trabow cu supeustamente nos tin brandweer pe. Un berguensa, danki na e voluntario cu toch ta trata di haci nan best.