Oranjestad - 1 September 2009 -

Durante un conferencia di Prensa e partido CURPA a laga sa cu nan ta un partido politico cu tin su fundeshi ankra den e Palabra di Dios, esta e Bijbel. E punto kardinal cu Partido CURPA kier ta pa e normanan, balornan y principionan di Dios lo prevalece den politica, gobernacion y comunidad. Drs. Robert Anjie a laga sa tambe cu tur denominacion, sea cu e ta catolico, evangelico, metodista of protestant, ta bon bini serka CURPA. CURPA su vision ta un Aruba unda Dios, Su husticia y su mandamentonan lo prevalece den politica, gobernacion, comunidad y famia, pa asina pueblo di Aruba en totalidad por disfruta di e bendishonan di Dios y asina biba den paz, harmonia y amor cu otro.

Segun Drs. Robert Anjie ta sigi splika cu nan ta convenci cu Dios kier ofrece Aruba un alternativa politico nobo den e elecion benidero. CURPA lo percura pa pone Dios promer cu tur cos den e proximo eleccion. Aki partido CURPA a presenta e 10 mandatonan cu lo pone Dios PROME cu lo crea un fundeshi nobo pa un Aruba nobo na unda Dios y Su Husticia lo prevalece y cu e 10 mandatonan lo ta NON-NEGOTIABLE. Es decir cu si encaso CURPA forma gobierno, e puntonan aki lo aparece den plan di gobernacion, sino no tin un gobierno di CURPA y cu CURPA lo sinta den oposicion.

Finalmente Partido CURPA ta pidi e pueblo di Aruba pa ban uni cu otro y cu partido CURPA pa asina crea un movecion cu lo pone DIOS PROME den e proximo eleccion pasobra DIOS ta e unico Salbacion y Solucion pa tur e probleman cu Aruba ta aden. Partido CURPA ta pone DIOS prome, abo tambe?
.