Aruba - 28 augustus 2009 -

Diaheubs atardi na Centro di Husticia na Macuarima (Santa Cruz), Cuerpo Policial Aruba a tene un conferencia di prensa unda nan a introduci un consepto nobo. Aki ta trata di un auto di surveillance unda na un manera cu bo no ta reconose como auto di polis, lo core riba e careteranan, pa asina gara esnan cu no ta manetene nan mes na e regla di trafico. Den e auto aki lo ta bai tin camera cu lo graba tur cos cu ta pasa riba e careteranan di aruba.

E persona cu wordo gara ta viola ley di trafico lo no ricibi boet solamente. E chofer tambe lo wordo mustra e grabacion di e infracion cu nan a comete. Asina e lo educa e persona tambe, pa asina e sa kiko ta e peligronan cu e a crea y e consequencianan si algo mester a pasa.

For di KLPD (Korps Landelijke Politie Dienst) a manda un Brigadier y un Inspecteur di Politie, pa asina train 8 agente policial di e CPA (Cuerpo Policial Aruba). Den e curso nan a siña con pa handle cu e camera y demas equipo electronico den e auto aki. Aki Alto Comisario di Polis na Aruba, sr. Peter de Witte, a remarca cu den e curso nan no a focus mucho riba con pa maneha e auto den caso special asina. Su palabra di conseho; Tene auto henter.

Pafor di e centro, e auto special aki a wordo presenta na prensa y cada un por a wak y admira e technologia abordo di e vehiculo aki. Un pabien na e Cuerpo Policial di Aruba cu nan vehiculo di surveillance.
.