Oranjestad - 8 augustus 2009 -

E fundador di Pennsylvania, Sr. William Penn a yega di bisa, “Si hende no kier wordo goberna pa Dios, e lo wordo goberna pa Tyranonan.”

Aruba lo wordo goberna pa Dios? ABSOLUTAMENTE CU NO!
Aruba a saca Su Buki for di nos scolnan y a saca Su palabranan (e 10 Mandamentonan cual E mes a scirbi – Exodo 32:16; Deut. 5:22) for di nos Corte di Ley. Asina cu Aruba a saca e 10 Mandamentonan for di e scolnan, nan a reemplase cu humanismo y atheismo.

Ta posibel cu Aruba por yega na ser goberna pa Dios? NUNCA.
Den nos constitucion no ta ser menciona Christo Jesus of cualke palabra di Dios. Ningun di nos politiconan ta teme Dios pa core un campanja pa Dios enbez di un campanja politico. Nos Gobierno ta invita Pasotornan Catholico pa bin bishite (ditto Hitler, Mussolini, Napoleon, Castro, Chavez, etal.) y ta sostene e creencia cu e “Tata Santo” (Juan 17:11) sinta na Vaticano tin authoridad absoluto. Nos Gobierno a acepta e theorianan di Darwin, Spencer, Hawking y Einstein di ta mas superior cu Scritura Santo. Ningun politico a hasi nada pa Dios durante tur e tempo cu nan a core campanja, contra Dje. Ningun politico of partido a dicidi di bini cu un plan biblico pa goberna e isla di Aruba, alcontrario, tur a bini cu plannan pagano socialistico sin consulta un dia cu Dios, esun cu nan ta grita yama tur ora nan ta den problema – “hay mi Dios”.

Aruba lo kier wordo goberna pa Dios? NUNCA.
Si Aruba dicidi esaki, Aruba lo mester di honra Dios su palabra den tur area di bida y sera tur clubnan nocturno, prohibicion di alcohol, prohibicion di musica pagano, etc. Pero net lo contrario ta sosode; nos pueblo ta gusta bagabunderia y despues cu calamidad bini (y esaki lo bini pronto!) nan ta core drenta “Misa” pa pidi Dios yudansa. Hypocritanan! Nos pais ta den e estado cu e ta den dor cu nos lidernan politico y religioso a manda nos isla den un decandencia y apostacia cu solamente Dios por cura. Aruba nunca no tabata un isla Christian, unda bo ta hanja predicadornan riba caya ta predica di e maldishon di Dios cu lo bini. Ningun lider religioso aki na Aruba (Sofia, Petrona, Grandfield, Malmberg, Orman, Chappell, Kelly Jr., etc.) ta para na cualke scina y proclama e Evangelio di Gracia na e pueblo. Ningun di nan ta para na scina di caya y grita cu boz halto: “Comberti of Kima”. Nan ta hunga religion y politik den Iglesia y ta keda den e edificio pa no ofende ningun hende.Den e Era Nobo aki, unda tur cos mester wordo mira Positivo y tur cos ta wordo relativa, nos tin un nesesidad grandi di e palabra di Dios den nos bida. Henter nos sociedad a wordo sedusi cu e Psychologia di Auto-Estima, cu Rationalismo, cu Versionnan di Beibel moderno y cu Musica pagano. Asina cu cualke hende predica un mensahe completamente biblico, e lo wordo acusa di ta un biblicista of fundamentalista, pa esnan cu ta clama di ta kere den Dios (e diablonan tambe ta kere den Dios! – Santiago 2:19).

Den e historia humano cu ta bayendo 6000 anja (scirbi pa mas di 40 author – Gen. pa Rev.), nos no por encontra un caminda unda Dios a bendiciona of lo bendiciona cualke nacion si nan biba manera e Arubianonan ta bibando desde 1945. Ora nos tende algun hende papia cu Dios ta bendiciona Aruba, nos ta tende e voz di un sonjador of un hende cu ta biba den un fantasia religioso. E ultimo paso cu Aruba a tuma den e direccion di Fierno y e Abismo ta dor di crea y produci un Beibel falso na Papiamento, titula “Beibel Santo”. E beibel aki ta mes santo cu e Koran of Alice in Wonderland. Desde cu e Beibel falso aki a sali riba mercado, Aruba a cay politicamente, financieramente y spiritualmente. Aruba lo wordo goberna pa Dios? Esaki lo ta e “dios di e mundo aki”, Satanas – 2 Cor. 4:4).

Boso ta cla pa un revivamento? Uno lo bini! Cla pa un Cambio? AVP, Democracia Real y Mep ta cla pa trese cambio. Den cua direccion? Binti siglo prome cu e United Nations (UN) a wordo forma, nan a bisabo ki cambio lo bini y ken lo goberna e 192 nacionnan den e United Nations. Lo nos hanja un dictadura religioso mundial operando via Vaticano y UN (Rev. 13:4-8; 2 Thess. 2:3-12; Dan. 11:36-39; Isa. 14:4-17). Lo bo mester adore y acepte of muri di hamber (Rev. 13:16-18) of wordo decapita (Rev. 20:4). Esaki no ta fanatismo of extremismo, pero esaki ta e berdad absoluto scirbi den un buki ABSOLUTO, scirbi pa un Author Absoluto: Dios, kende a destrui e Imperio Babilonico (536 B.C.), e Imperio Persico (300 B.C.), e Imperio Griego (200 B.C.), e Imperio Romano (476 A.D.), e Imperio Spanjo (1588), y e Imperio Ingles (1921). Dios actualmente ta preparando pa dera USA, “the land of the free and the home of the brave” (1964-2011).

E pueblo di Aruba mester cuminsa prepara pa catastrofenan natural, economico y spiritual. Aruba mester cuminsa na arepenti di nan picanan, manera Niniveh, pa Dios no plama demasiado maldicion riba e lugar aki. E lidernan religioso y politico cu nos elegi ta esnan cu lo bai goberna nos cu un man di hero y “obliga” nos pa tuma e Marca di e Bestia. Tur cos ta cla pa esaki. Dicidi bon cla pa ken bo ta bai vota: pa Christo y Su palabra cu moral biblico of pa un partido cu ta mes corupto cu e Nacional Socialistic Party, cual a priminti prosperidad, libertad y harmonia y a dunanan Concentration Camps (Hitler, Stalin, Mao, Pol Pot, Obama, etal). R.I.P.: “Esnan cu no kier wordo goberna pa Dios lo wordo goberna pa Tyranonan.”