Exposicion Lens di Mi Wowonan

E conocido Leo Vrolijk a anuncia su di 5 aña di e exposición di "E Lens di mi wowonan". Esaki en conexion cu Dia di Prensa. E biaha aki Leo Vrolijk lo celebra hunto cu e corant "Amigoe di Aruba". Motibo ta cu Amigoe di Aruba ta celebrando nan 50 aña di existencia. E exposición mescos cu añanan promer ta consisti di potretnan di esnan trahando den prensa. Tin potret cu ta capta e essencia di un noticia den un solo shot, tin ta duna nos un insight den kiko e fotografo sa haya nan mes aden, ora di cubri noticia y tin potret cu simplemente ta djies un momento of imagen bunita cu a wordo capta door di e lens di prensa su wowonan. E aña aki e exposición lo wordo dedica na tres persona cu a traha hopi aña como fotografo. Aki ta wordo referi na Olivio de Cuba, Stanley Illidge y Anselmo Kock, mihor conoci como "Chemmy". Leo Vrolijk a laga sa, cu e biaha aki nan tin como 192 potret di en total 25 participante pa e exposición aki. Leo a remarka cu e calidad di potret a subi basta hopi y ta complimenta e generacion nobo di fotografo di prensa. Un danki ta bai tambe na entre otro RBC Royal Bank (cu ta sostene e expocision aki), coleganan di prensa y demas persona cu a para tras di su idea y cu a juda pa haci tur esaki posible. E exposición di "E Lens di mi Wowonan" lo ta habri pa publico cuminsando 3 di September, entre Dialuna pa Diabierna durante ora di oficina, na Cas di Cultura. Pueblo di Aruba ta wordo invita pa bin aprecia e bunita exposición aki dialuna awor y gosa di e 192 diferente potret y ademas potretnan en conexion cu e 50 aña di existencia di "Amigoe di Aruba".