Recientemente a tuma lugar e "Pre Teen Modeling International" na Republica Dominicana. Esaki tabata dia 3 di juli te cu 9 juli unda varios participante di diferente pais manera e.o. Costa Rica, Puerto Rico, Venezuela, Aruba, Panamá, Colombia, Guatemala, Estados Unidos, Switzerland, Isla Saona, Isla Catalina y República Dominicana sa asisti na e certamen aki.

"Chaz modeling & talent school" di Castity Kock-Hodge, cu a wordo funda na 1998, a manda un total di 5 kandidato den diferente categoria. E aña aki Chaz Modeling a participa pa di 10 aña. Den e categoria di Pre Teen Model International, Louisiana de Ruiter, di apenas 15 aña, a logra di bai cu tur titulo den su categoria. Fuera di a wordo eligi como e "Pre Teen Model International 2012" e hobencita aki haya e premio di "Best Costume", "Best Talent Show" y "Best Gala Dress". Aruba su nomber atrobe a luci riba tereno internacional mescos na aña 2011, unda un otro hobencita di Aruba a logra e titulo aki, esta Isamae Solognier.

Durante un encuentro na cas di Chastity Kock-Hodge di e "Chaz modeling & talent school", honor a wordo duna na Srta. Louisiana de Ruiter y alaves a haci uso di e oportunidad pa gradici tur esnan envolvi cu a haci esaki posible y tambe un danki a wordo duna na e medionan di Prensa cu a duna cobertura na e evento aki. Cu hopi orguyo Chastity Kock-Hodge a gradici un y tur y un bunita recuerdo a wordo duna na esnan presente. Nos di Arubadag.com ta desea Srta. Louisiana de Ruiter tur clase di exito y nos ta keda den espera di tende mucho mas di su persona den futuro. Pabien!

Pa wak algun potret di e anochi aki